இன்ஸ்டாகிராமில் வந்தாச்சு மாஸான மாற்றம்! இனி பழைய ஆடியோவை இப்படி சுலபமா மாற்றலாம்!

சமூக வலைத்தள தளங்களில் ஒன்றான இன்ஸ்டாகிராமை நிர்வகித்து வரும் மெட்டா நிறுவனம், தனது பயனர்களுக்கு மேலும் சிறந்த அனுபவத்தை வழங்கும் வகையில் தொடர்ச்சியாகப் பல்வேறு புதிய அம்சங்களை அறிமுகப்படுத்தி வருகிறது. அந்த வகையில், பயனர்கள் தங்களது இன்ஸ்டாகிராம் கணக்கில் ஏற்கனவே பதிவிட்ட பழைய போஸ்ட்களில் (Posts) உள்ள ஆடியோவை மாற்றிக் கொள்ளும் புதிய அம்சத்தை மெட்டா நிறுவனம் தற்போது வெளியிட்டுள்ளது. பதிவுகளை நீக்க வேண்டிய அவசியமில்லை பொதுவாக, ஒரு பதிவில் சேர்க்கப்பட்ட பின்னணி இசை அல்லது ஆடியோ பிடிக்கவில்லை என்றாலோ, அல்லது காப்புரிமை (Copyright) பிரச்சனைகள் காரணமாக ஆடியோ முடக்கப்பட்டாலோ, அந்தப் பதிவையே மொத்தமாக நீக்க வேண்டிய சூழ்நிலை பயனர்களுக்கு இருந்தது. இதனால் அந்தப் பதிவிற்கு கிடைத்த லைக்ஸ், கமெண்ட்கள் மற்றும் ரீச் ஆகியவை வீணாகிவிடும். ஆனால், தற்போது அறிமுகம் செய்யப்பட்டுள்ள இந்த புதிய வசதியின் மூலம், ஏற்கனவே பதிவிட்ட பழைய போஸ்ட்டை நீக்காமலேயே, அதில் உள்ள பழைய ஆடியோவை அகற்றிவிட்டு புதிய ஆடியோவை சுலபமாக மாற்றிக் கொள்ள முடியும் (Replace Audio). பயனர் அனுபவத்தை மேம்படுத்தும் முயற்சி இன்ஸ்டாகிராம் பயனர்கள் தங்களின் பழைய நினைவுகளைப் புதுப்பிப்பதற்கும், தற்போதைய டிரெண்டிங் பாடல்கள் அல்லது ஆடியோக்களை பழைய போஸ்ட்களுடன் இணைத்துக் கொள்வதற்கும் இந்த அம்சம் மிகவும் பயனுள்ளதாக இருக்கும். போஸ்ட்டில் உள்ள மூன்று புள்ளிகள் (Three Dots) கொண்ட மெனுவிற்குச் சென்று 'Edit' ஆப்ஷனைத் தேர்வு செய்வதன் மூலம், ஆடியோவை மாற்றும் இந்த புதிய வசதியைப் பயன்படுத்திக் கொள்ள முடியும். மெட்டா நிறுவனத்தின் இந்த புதிய நடவடிக்கை பயனர்களிடையே பெரும் வரவேற்பைப் பெற்றுள்ளது.